22 febrúar 2017

Kúba #3 - Brúðkaup í Havana

Nú er hávetur á Kúbu og það leynir sér ekki. Hitastigið fer sjaldan langt yfir 30 gráður, ekkert avocado til því það er "off season", ananasinn er frekar smár og svona mætti lengi telja. Það er ekki bara neikvætt að hafa vetur því hér rignir ekki á veturna. Það koma jú hitaskúrir stöku sinnum en ekkert sem heitið getur.

Allavega óháð árstíðum þá gerðist það á dögunum að við Guðný gengum í hjónaband hér í Havana. Forsagan er í sjálfu sér ekki löng. Við höfðum keypt ferð til Kúbu þar sem við ætluðum að dvelja allan febrúar. Jafnframt höfum við lengi velt brúðkaupi fyrir okkur; hvar og hvenær. Upp kom sú hugmynd að kannski væri bara flippað og skemmtilegt að gifta sig á Kúbu fyrst við værum á annað borð á leiðinni þangað og hefðum nægan tíma. Úr varð að við redduðum öllum pappírum og gerðum okkur klár í þetta.
Á Kúbu skálar maður í Cuba Libre og Mojito þegar maður giftir sig.
Það vildi svo heppilega til að hinn kúbverski sýslumaður, sem gaf okkur saman, er staðsettur skammt frá skólanum mínum. Í einum frímínútum skutust við Guðný til sýslumanns og könnuðum aðstæður. Kom í ljós að við þyrftum að bíða einhverja stund eftir að fá úrlausn okkar mála. Á þessum tímapunkti héldum við að við værum einungis að panta tíma fyrir giftingu síðar í vikunni. Svo var heldur betur ekki, eins og ég komst að síðar. Ég snéri aftur til spænskunáms en Guðný tók það á sig að sitja þar til röðin kæmi að henni. 
Hann Marcos sýslumaður hélt það nú að það væri lítið mál að gefa okkur saman. 
Ég sat í makindum og ræddi (á spænsku að sjálfsögðu) við kennarann þegar Guðný birtist í skólastofunni og tjáði mér að við værum að fara að gifta okkur eftir 20 mín. Einhvern veginn tókst mér að koma kennaranum í skilning um að gera þyrfti hlé á kennslu vegna fyrirhugaðs brúðkaups. Satt best að segja veit ég ekki hvað hún hefur haldið um þetta hálf bilaða lið frá Íslandi. 
Við fengum ljósmyndara til að festa nokkrar myndir á filmu. Þessa tók hann fyrir okkur á símann minn. Afrakstur hans eigum við eftir að sjá.
Skömmu síðar vorum við mætt á kontór sýsla sem er hinn ágætasti drengur og talaði mjög bærilega ensku sem auðveldaði athöfnina til muna. Ég að sjálfsögðu í stuttbuxum og á bol, enda hávetur og því varla hægt að vera ber að ofan. 
Chevrolet Bel Air '55 módel var fararskjótinn í ljósmynduninni. Þetta er sami bíll og Madonna notaði þegar hún bar í Havana fyrir ekki svo löngu síðan.
Með tímanum hafðist þetta svo allt saman. Svolítið af pappírum að skrifa undir. Fara fram og bíða. Fara eitthvað annað og borga. Fara svo aftur og borga meira. Skrifa undir aðeins fleiri pappíra. Bíða í klukkutíma og þá var allt klárt og við stóðum allt í einu fyrir utan skrifstofu sýslumanns, á stuttbuxum og alveg harðgift. 

13 febrúar 2017

Kúba #2 - Havana

Ferð með skólanum um "gömlu Havana" sem er litskrúðug og falleg.
Enn erum við stödd í Havana. Dagarnir ganga þannig fyrir sig að ég er í spænskunámi fram að hádegi. Í skólanum er svo salsa dansnámskeið strax í kjölfarið sem ég ákvað að sækja ekki. Ég er hreinlega ekki nógu mikill salsa-maður. Svo um miðjan dag er boðið upp á viðburð með skólanum sem getur verið ferð um miðbæinn, á ströndina, á safn o.s.frv. Við höfum aðeins nýtt okkur þetta. 


Guðný á góðri stundu í Havana.
Í skólanum er kennari sem heitir Ingmar í höfuðið á samnefndum sænskum leikstjóra sem var í miklu uppáhaldi hjá foreldrum hans. Þetta varð til þess að ég reyndi að útskýra mannanafnanefnd á Íslandi fyrir kennaranum mínum en varð litið ágengt. Hún skildi ekki af hverju Íslendingur mætti ekki heita þessu fallega nafni í höfuðið á jafn færum leikstjóra. Það hjálpaði henni ekki að skilja þetta þegar ég sagði að hann mætti gjarnan heita Ingimar það væri bara ólöglegt að sleppa heilu "i" í nafninu. Ef fólk vildi heita eitthvað annað en Jóna og Jón þyrfti að fá leyfi. 


Solo Cuba 
Í einni ferðinni með skólanum fórum við út úr bænum með rútu. Þjóðvegir á Kúbu eru ekki ósvipaðir þeim íslensku. Þeir virðast reyndar oftar breiðari, þ.e. fleiri akreinar, og vissulega aldrei með snjó og þar af leiðandi aldrei saltaðir. Bílarnir á vegunum eru jafnframt eldri og oftast er skógur eða tré við þjóðvegina. Vegirnir hér eru hins vegar töluvert ósléttir eins og á Íslandi þannig að líkindin eru nokkur. Reyndar skilst mér á innfæddum að vegirnir hafi batnað mikið hérna síðustu ár öfugt við Ísland. Mögulega kemur maður aftur hingað innan nokkurra ára og þá verða vegirnir umtalsvert betri en heima á Fróni! 

Æskan leikur sér á góðviðrisdögum.


Rússneska sendiráðið í Havana fékk arkitektaverðlaun á sínum tíma. Það er nóg að ýta á einn takka og þá breytist húsið í eldflaug eða risa bíl. Þetta fyrirbæri myndi sóma sér vel í Norðlingaholti. 

Þar til næst - lífi byltingin.





11 febrúar 2017

Kúba #1 - Havana

Við erum loks mætt til Havana höfuðborgar Kúbu. Hér ætlum við að vera næsta mánuðinn og ferðast um eyjuna. Nánar að því síðar.

kort af Kúbu í Lonely Planet bókinni 

 Kúba er spennandi staður. Íbúar eru rétt ríflega 11 milljónir og eyjan er lítillega stærri en Ísland að flatarmáli eða um 110 -111 þúsund ferkílómetrar, sem gerir Kúbu að stærstu eyjunni í Karabíska hafinu. Rétt er að halda því til haga að "eyjan" er Isla Grande sem er stærsti hluti Kúbu sem telur í heild yfir 4.000 þúsund eyjar og rif. Eyjan er frekar löng og mjó ef svo má segja því hún er um 1.250 km. frá austri til vesturs en minnst 31 km. og mest 193 km. frá norðri til suðurs.
Næstu nágrannar eru Bandaríkin (Flórída 180 km.) og Bahamas í norðri, Haítí (80 km.) í austri, Jamaíka (140 km.) í suðri og Mexíkó (210 km.) í vestri.
Guðný með Mojito, þjóðardrykk Kúba 
Allavega þá verður heimilið okkar næstu vikuna herbergi hjá þeim Enmu og Estelu eða Emmu og Stellu eins og við köllum þær. Um er að ræða tvær eldri konur sem eru hættar að vinna. Önnur þeirra var píanisti og hin fyrirsæta. Við fengum að sjá nokkrar skemmtilegar myndir frá því snemma á fyrirsætuferlinum, svona um það bil í þann mund er Fidel og Che voru að hefja "La revolución". 
Byltingarsafnið - La revolución 
Önnur húsmæðra okkar talar ágæta ensku en hin einungis spænsku. Auðvitað er það sú síðar nefnda sem talar meira en hin þannig að Guðný skilur ekkert og ég næstum ekkert. Það er samt ekki aðal atriðið að skilja allt sem sagt er. Það skiptir líka máli hvernig það er sagt.
Che utan á einu ráðuneytinu

Látum þetta nægja í bili. Ég ætla að fara í skólann og reyna að læra smá spænsku eða hið minnsta reyna að rifja upp þessi helstu orð sem maður þarf að nota. Færslurnar hérna eru ekki endilega alveg í rauntíma því internetið finnst ekki hvar sem er á  Kúbu. Stundum bíða færslurnar birtingar fram að næstu nettengingu.

fallegir litir og gamlir flottir bílar eru einkenni Havana 

22 maí 2014

Fimmti hluti - Sofið undir berum himni í eyðimörkinni

Nóttin í tjaldinu reyndist ekki jafn köld og gert hafði verið ráð fyrir. Mér var frekar heitt og Guðnýju var ekki kalt. Þegar við vorum rétt lögst í bedda (það voru rúm í tjaldinu okkar) heyrðum við skrítið hljóð sem við reyndum að bera kennsl á. Guðný taldi að þetta væru hrotur. Mér þótti það ólíklegt þar sem hópurinn (10 manns) fór allur á sama tíma í tjöldin og það væri líklega heimsmet ef einhver væri sofnaður og byrjaður að hrjóta fimm mínútum eftir að við fórum úr matartjaldinu. Þar sem ég hafði enga betri tillögu að upphruna þessa skringilega hljóðs sætti ég mig við tilgátuna. Nokkar mínútur liðu og þá heyrðist allt í einu þetta skrítna hljóð í ábyggilega 7-8 sekúndur samfleytt. Þá var ljóst að þetta gátu ekki verið hrotur. Ekki nema það væri hvalur að hrjóta eða einhver sem hefur fullkomna þá list að hrjóta samfleytt, þ.e. að hrjóta jafn á innsogi og útblæstri án þess að stoppa á milli. Mætti kalla það einhvers konar jóga-hrotur.

Þetta lítur ekki út fyrir að vera tjald á þessari mynd en er það samt. 

Auðvitað hélt þessi óvissa fyrir mér vöku. Ekki hljóðið sjálft heldur það að vita ekki hvaðan það barst. Að endingu rann þetta upp fyrir mér. Gædarnir sátu úti og voru að reykja Shishu eða vatnspípu. Hljóðið kom þegar reykurinn var soginn gegnum vatnið. Þá má ábyggilega heyra svona hljóð í einhverju lagi með Cypress Hill.

Allavega þá vorum við stödd í Wadi Rum eyðimörkinni sem T.E. Lawrence (eða Arabíu-Lawrence sbr. frábær bíómynd Lawrence of Arabia) fjallaði um í bók sinni Seven Pillars of Wisdom. Eyðimörkin er stór eða um 100 km. frá norðri til suðurs. Þó er ekki nema hluti hennar verndarsvæði eða um 720 ferkílómetrar (ég las einhvern tímann að höfuðborgarsvæðið væri um 1.000 ferkílómetrar en segi það án ábyrgðar). Þarna hefur þjóðflokkur Beduina búið í margar aldir. 

Þegar rætt er um eyðimörk sjá margir fyrir sér sand (eðlilega!) og ekkert annað. Eflaust eru sumar eyðimerku bara sandur en þessi er það ekki því um allt eru klettar, bæði stórir og litlir og jafnvel heilu fjöllin. Hæsti kletturinn er til að mynda 1.840 metrar á hæð (270 metrum lægra en Hvannadalshnjúkur) og mætti því jafnvel kalla fjall frekar en klett.

Guðný í eyðimörkinni

Í grennd við eina uppsprettuna stóð eitt tré sem
ku vera mjög gamalt.

Þarna er að finna þó nokkrar lindir og vinjar og var svæðið mjög mikilvægt þeim sem þar fóru um á öldum áður. Er meðal annars að finna áletranir (e. inscriptions) í klettunum frá því 4.000 árum fyrir krist þar sem ferðalöngum var vísuð leiðin að næstu uppsprettu og hvert væri best að stefna o.s.frv. Mjög áhugavert.

þarna má m.a. sjá áletrun þar sem kona er að fæða barn. 

Allar hafa þessar áletranir þýðingu. Ég man samt ekki hvað þær þýða!

Eftir nóttina í tjaldinu vörðum við deginum á rúnti um eyðimörkina á gömlum Landcruiser jeppa ásamt leiðsögumanninum okkar honum Aíd. Við stoppuðum reglulega í tjöldum hjá heimamönnum sem bjuggu í eyðimörkinni og þáðum te og spjölluðum. Gædinn okkar var nokkuð vinsæll því hann var með Shishuna (vatnspípuna) sína með í för og bauð upp á smók.

Við skoðuðum ýmis flott svæði, uppsprettur, kletta, gil og nutum kyrrðarinnar. Undir lok dags horfðum við á sólsetrið á meðan gædinn kom upp litlum búðum þar sem við elduðum dýrindis máltíð og sváfum svo undir berum himni um nóttina. Það var hreint út sagt ólýsanlegt að liggja þarna í kyrrðinni og sofa undir stjörnubjörtum himni og tunglsljósi. Klárlega hápunktur ferðarinnar. Best að leyfa bara myndunum að tala sínu máli. 

Guðný að labba upp sandbrekku mikla! 

Andri Abdullah virðir fyrir sér útsýnið.



Í heimsókn hjá Bedúína sem bauð að sjálfsögðu upp á te.


Þessi var meistari heim að sækja. Hann gaf mér munntóbak sem
hann hafði búið til sjálfur. Ég gaf honum íslenskan rudda í staðinn. 

Guðný prinsessa af Nielsen.
Fyrsti áningarstaður. Þarna elduðum við hádegismatinn.

Toyota er vinsæl í eyðimörkinni.



Þarna er parið búið að klifra upp á þennan fína klett. Tunglið sést í baksýn.

Sólsetur í Wadi Rum. Næstum jafn fallegt og sólsetrið í Skjálfandaflóa.

Áningarstaður tvö. Þarna var eldað og gist yfir nótt.


Herbergið okkar!

Guðný að bíða eftir að maturinn verði tilbúinn.

Maturinn klár. Reyndar frábær matur sem við fengum þarna í myrkrinu.

19 maí 2014

Fjórði hluti - Petra og lögreglumenn sem töluðu ekki ensku

Að vana tókum við daginn snemma og lögðum nú leið okkar inn í hina fornu borg Petru. Það er óþarfi að eyða mörgum orðum í að segja frá borginni. Ekki af því borgin er ekki áhugaverð, síður en svo, heldur er þetta upplifun sem verður aldrei lýst almennilega í orðum.
Petra þýðir steinn eða klettur enda er um að ræða heila borg sem er höggvin inn í kletta á stóru svæði. Þarna eru einhver 500 grafhýsi, leikvangur eða leikhús og allskonar minjar og fegurð sem erfitt er að lýsa í orðum.

Eins og Machu Picchu var borgin "týnd" og uppgötvuð á ný árið 1812 af svissneskum landkönnuði. Borgin er, eins og ég hef áður nefnt, eitt af sjö undrum veraldar og algjörlega þess virði að heimsækja.
Til að komast inn í borgina þarf að ganga inn gil sem er
ríflega kílómeter að lengd. Við endann kemur maður
inn á stórt opið svæði þar sem þetta grafhýsi blasir við.

Einn svefnherbergisglugginn.

Það tók mörg hundruð ár að "smíða" borgina.
Hversu mörg hundruð er ekki vitað.

Selfie með hluta af Petru í baksýn.
Á göngu okkar um borgina villtumst við um tíma. Kannski ekki beinlínis villt því við vissum nokkurn veginn hvar við vorum. Meira að við vorum komin út úr helsta svæðinu þar sem túristarnir voru. Þá rákumst við á þetta fína bílskýli. Ótrúlega framsýnir þessir Nabatear (þjóðflokkurinn sem byggði Petru) að gera svona fínt skýli.
Gamall bíll í gamalli borg!
Þegar við höfðum gengið borgina þvera og endilanga var tími kominn á næsta áfangastað sem var Wadi Rum eyðimörkin. Þar ætluðum við að dvelja næstu tvær nætur. Hótelið hafði útvegað okkur leigubílstjóra til að keyra okkur þessa tveggja klukkustunda leið (tími ku vera betri mælikvarði en kílómetrar á þessum slóðum). Leigubílstjórinn var reyndar ekki leigubílstjóri heldur bara bílstjóri. Hann ók gömlum Nizzan Sunny og svo óheppilega vildi til að hann var ekki sérlega vel búinn bílbeltum.

Reyndar var hann ágætlega búinn bílbeltum því það voru alveg jafn mörg belti í þessum bíl og í öðrum bílum sem taka fjóra farþega. Vandamálið var að þessi bíll hafði eingöngu einn "gaur" til að stinga beltinu í og festa það. Því voru góð ráð dýr. Við veltum því fyrir okkur hvort við ættum að taka steinn, skæri, blað upp á hvort okkar fengi að spenna beltið. Endanleg niðurstaða var sú að flækja beltin tvö einhvern veginn saman og vona það besta.

Ferðin gekk áfallalaust fyrir sig þar til við gáfum fram úr manni á einu hestafli. Sá var með hestinn í hvínandi botni svo það spýttist grjót undan hófum hans, sem skullu af miklum krafti á Nizzan Sunny er honum var ekið fram úr á fullri ferð. Bílstjórinn stöðvaði snarlega og hélt reiðilestur yfir knapanum, sem var hress eldri maður. Sá sat á baki og skellihló, sem gerði okkar mann pirraðan. Líklega var hann að hlægja því bíllinn var rispaður og beyglaður allan hringinn og því ómögulegt að átta sig á því hvort grjótið frá hestinum hafi valdið einhverjum skemmdum.

Málið var leyst þannig að við spóluðum af bræði af stað og knapinn hélt áfram að hlægja. Gekk ferðin áfallalaust fyrir sig um stund eða þar til lögreglan stöðvaði okkur við reglubundið eftirlit. Við Guðný sátum eins og hálfvitar með beltin flækt saman í baksætinu þegar lögreglumaðurinn kom að bílnum. Hann taldi vissara að skoða vegabréfin okkar.

Nú hófst áhugaverð atburðarás. Bílstjórinn og lögreglumennirnir rökræddu um stund. Almennt er talið að þeir síðarnefndu hafi gert athugasemd að bílstjórinn væri að keyra farþega gegn gjaldi án þess að hafa tilskilin leyfi (talið er ólíklegt að þeir hafi verið að gera athugasemd við bílbeltin). Lögreglumennirnir áttu eitthvað vantalað við okkur Guðnýju en töluðu ekki ensku. Staðan var því sú að sá eini á svæðinu sem talaði bæði ensku og arabísku var sakborningurinn, bílstjórinn. Að láta sakborning túlka yfirheyrslu yfir vitnum er vond hugmynd. Því var brugðið á það ráð að stöðva næstu bíla þar til næðist í einhvern sem gæti túlkað fyrir lögregluna. Á meðan við biðum kom eldri maður ríðandi fram hjá á úlfalda og glotti til okkar. Ekki var kannað hvort hann talaði ensku enda það talið ólíklegt. Loks kom leigubíll sem ekið var af bílstjóra sem kunni ensku. Yfirheyrslan var í raun bara ein spurning; hvað við hefðum greitt fyrir aksturinn. Á endanum leystist málið og við fengum að halda áfram. Líklega hefur skipt máli að við höfðum greitt sanngjarnt verð (teljum við), þ.e. að bílstjórinn var ekki að svindla á okkur. Mögulega hefur það líka skipt máli að ef við hefðum ekki getað haldið ferðinni áfram með bílstjóranum hefðum við verið stödd út í svokölluðum buska sem hefði ekki verið sniðugt.

Leiðarendi var í tjaldbúðum út í miðri eyðimörkinni (þá vorum við komin úr leigubílnum og í jeppa). Þar höfðum við fengið úthlutað okkar eigin tjaldi. Eins og það getur orðið heitt í eyðimörkinni á daginn getur orðið býsna kalt þar á næturnar. Það stefndi því í kalda nótt. Meira um það næst.